CMC uspija, a Stipe na Lovetovu izronija

Dvi noći san gušta i još nisan moga doći sebi od tog CMC festivala. A kako i bi kad je puno toga bilo za čuti i vidit. Sve sama zvizda do zvizde i toliko puno svita, našlo se na našoj rivi.

Tako je CMC posta prepoznatljiv znak Vodic, a turisti to dobro znaju i sa svih stran dolazu. A na sceni ne zna se ko je bija od koga bolji: oš Škoro, Zečić, Lile, Mate Bulić, Neda Ukraden, Darko Domijan i drugi. A i zvizde su bile zadovoljne organizatorima i Vodičanima ki su ih tako lipo primili i cilu večer pljeskom nagradili. Malo je ko da nije na festivalu zadovoljan bija, ali Bože moj svako ima pravo na tu- slobodu mišljenja u demokraciji.

Pa mi je tako bilo smišno i nisan očeekiva da je jedna šjora u vezi festivala u Vodicami napisala kako ništa ne valjaju izvođači, a bilo ih je ni manje ni više nego 43. Dok je druga šjora dodala da se boji da CMC nebi posta ka „Ultra” u Splitu di se fetive svit buni kontra turisti, iako in donose puno šoldi.

A Vodice zbog toga nimaju brige, jer na našen festivalu more se viditi lipi, pametan i kulturan svit ki ima kriancije i prema mištanima i prema sebi samima.

Pa kad se dobro natočaju, znaju di će se odtočati. A ko nebi pija kada Zečić i Lidija Bačić piva, a onda još Nives Celzijus užge ariju, a Škoro, Vigor, Mladen Grdović  i drugi dignu rivu na ples i urnebes. Zato nima straja za kvalitetu CMC festivala, jer turistima tribaju fešte a i šjorama da zavrte svoje lipe vešte. Jer lipo sunce i more nije uvik dosta da im nezaboravni godišnji u glavi osta, pa da nan se druge godine opet vrate i zavole te naše vodiške gušte i užance. 

Furešti svit voli uvik nešto novo vidit, šta ne viđa svaki dan pa je tako jučer na i šjor Stipe iz Divinga Centra Vodice na plaži u Lovetovu izronija i prava atrakcija bija. Izaša je iz mora onako elegantno ka pravi morski delfin u svojoj crnoj ronilačkoj odori i maski, a oko njega radoznali furešti svit pita se šta Stipe sada čini.

A on je u svojoj spasilačkoj akciji bija i jednom čoviku bovu spasija. Stavija mu je novu debelu kadenu ka će sad siguno njegov brod od maštralade i juga čuvati. A one druge turiste željne ronjenja i na morsko dno vodiškog arhipelaga odvesti. Da furešti svit zna i u našim morskim dubinama uživat. I zato Stipi svaka čast jer ronilac nije lako biti!

Lipo pozdrav sa Lovetova

PAŠKO