VIRUJ U JUBAV, JER JUBAV JE SVE!!! Oće li se lipotica vratit vodiškon slikaru?

Dobra je ona stvar ča san je vidija ovih dan u novinan, kako jedan naš slikar dolika iz sela traži divojku koju je prije sedam godin u Vodicami slikiva.

Da mu se javi i na slikanje vrati ? Baš sad, i još ima vrimena. Koliko vidin na slici je ispala dobro, nima šta Anjc A, lipotica od  glave do pete.

Pitan doli u portu moga šjora Josu, šta promatra furešti svit svaki dan već sedandeset godina, kako bi on to prokomentira, jer čovik ima refužo iskustva po tin žensko-muškin pitanjima?

A on mi ćakula: -„Viruj u jubav” jer to je prava stvar, a da nisan virova u jubav već bi odavno bija mrtav. I drago mi je da je naš slikar tako postupija, jer ipak on je punih sedan godin nadu u svon srcu goija. I ko zna da nije bilo te nade, možda se čovik nekad ujtro ne bi ni iz posteje diga? A zato šta je tako virova u jubav naš zaljubljeni slikar jopet u selu slika i pomljivo furešte opet pinela. I čeka, čeka da počne sve opet ispočetka. A oće li biti baš tako samo dragi Bog zna”, govori mi moj šjor Joso svoj komentar.

E, da je bar pitura sa više band

Ali glavno je pitanje sad šta i moj Joso na njega odgovora nima: Oće li se ona lipotica sa slike prije sedan godin pripoznat i našen slikaru dolika u selo javit, i na slikanje vratit? Jer ko zna di se ona još svih ovih sedan godin slikivala i s koje bande namištala za slikanje?

Barba Joso ne viruje u povratak i kaže: -” Ma oće se vratit, nek je soli na rep metne!

Kaže mi još utješno Joso : -“ Možda je slikar falija kad  je slika samo sa zadnje bande, odostrag. Možda bi bila druga stvar da je odsprida pinela opitura. Oli i sa svih stran, s boka liva i desna. Ma kladin se da je to učinija ne bi je onda triba toliko godin čekat da mu se vrati za ponovo slikivat.

I ne bi je onda ni triba priko novin iskat. Došla bi ona sama da se namećila i friškinu od piture ćutila. Bez obzira šta mi šjor Joso o ciloj toj situaciji doli ćakula i šta svit o ovomu kontrešta, ja ipak virujen u našeg slikara, čini mi se da ima on utakmic u nogan, ali i da je u lipotu slike i te lipotice infiša.

I da čovik iz duše i cilega srca slika!!! A to je ta istinska lipota o kojoj je i naš Oliver piva ono: Viruju u jubav, jer ona je sve i ne živi bez nje. Ili ono: Još uja u svići ima. I zato ću s našin slikaron morat fermat i intervju učinit, da se prava istina o svemu vome zna. A ne ovako samo jedna banda. I neka je do tada našen slikaru sritno i da ne gubi nadu, jer je u pravu kad viruje u jubav!!

Lip pozdrav iz sela PAŠKO