19.28°C
Ma dok je ono Beroš gori u "Olimpija sky" na kongresu medicinarima govorija o stanju u rvackom zdravstvu doli na Hangaru ispod otela meni je kumpanjo Bepo kontreštava da je šef Stanja Nacije Zoran Šprajc na televizji reka, kako će rvacko zdravstvo ozdraviti tek 2030 godine. Znači još najmanje osam godin ćemo čekati da nas počne ličiti zdravo zdravstvo, a do tada paštroć? I onda pored takog bolesnog zdravstva moremo se još više razboliti, onako ka Šprajc, dva puta, ali se na svu sriću lišo provuka iz takih bolesnih medicinskih skuta, i sad naciju uči kako se od bolesna zdravstva živ izvući. Zato tribate sriće imati, jer morete ka pokojni Vlade otputovati. I Bog vas veselija! Nikomu ništa zato neće biti i samo će vas se novinari i bidna familja sitit. Nego da ne bi i ja počeja samo o bolesti i politici kontreštavat bolje mi se u masline zagledavat, jer govore da će litra uja po novomu više od 200 kuna guštat, pa moj svite ko će to moći uživat? A ja in kažen, tako je to kad škrta zemlja čuva svoje blago, a i sve je drugo krešilo otkad su nas čapali korona i taj nesritni rat, sve je sami fundać.
Ali bez obzira na tu skupoću da mi se bar malo više di iz sela maknit ča. Ma nije bitno di, samo se moran maknit, uteć negdi, nešto drugo viditi. Dojadilo mi je više cilo lito u portu kraj rive sidit i gledat kako furešti svit lipo užije, a ja sa svojim kumpanjama vrime sa ćakulon ubijen. I tako po cile dane uvik isto, pritačemo iz punoga u prazno i nazad, i niko nas ništa ne badaje. Nekad se osićan ka cipal od porta, uvaćen u duboku mrižu.
I sada lito je završilo, grožđe pobra, masline učinija i vrime je za vjađe činiti. Ali di se iz sela makniti? Na istok pojti, znači više doma ne dojti, za Ameriku i Štraliju pinez fali, jedino iti negdi u EU mi ostaje, od Austrije do Njemaške, Česke, oli Poljske.
Globalizacija, koronizacija i stinj u uši
A onda još sad su in u modi i najpopularnija ta studijska putovanja na kojima van lipo mozak ražentaju ka sa finim "PLAVIN RADIONOM" na temu digitalizacije, globalizma, koronizacije....
I sad je baza kad bilo koga pitaš di je bija, odgovara cili ponosan-na Studijskom putovanju. Ma iša bi i ja na to samo ne znan ko bi me mukte posla u đitu i ča bi tamo studira?
Moja stričevička Cvita mi kaže da ne moran ni studirat, onako đirajen po tin njiovin radionicami sa stinjom u ušima i pomalo drimuckat. I kom briga mukte putuješ i lipo piješ i ideš na račun raznih fondova, u drušvu lipoga mrljušavoga svita. Ali za tako šta moraš dobru vezu imati , a di ću ja bidan uvatit vezu kad mi zadnji put jedna lipa šjora komentirala kako Paškinu ćakulu pišen bez veze, zbrda zdola. Jedino kako govori, malo veze je imala ona ćakula u Šepurini sa Ruzarijen, a ono sve drugo: Zakloščica bolja od Kariba, Lipa Poljakinja u Vodican, Kapo od makine zalega ispod masline, Olivera u Šepurini vidilo 32 miljuna svita, itd... ne vride pišljiva boba. Pa ki će me onda taka "nadarena"sa pisanjem, koje je u svakon pogledu bez veze i još sa takvin ćakulami, stipendirat i poslat mukte na studijsko guštanje po EU?
E, da je kaka miništrantica ŽABAC nju bi poslali bez problema i veze svuda. Stričevićka Cvita mi govori da se ne triban ništa naidit, jerbo kome tribaju te moje ćakule, ka da i oni tamo u EU nemaju dosta skandali , ćakulavanja i svake vrste tramakavanja.
Tako meni ništa drugo ne ostaje nego procak na škinu bacit i o svon trošku u EU kreniti. A u boršu stavit: malo pancete, krvavic, Gavrilović paštete, baškota, travarice, malo vina, koju lapandinu i šćeriku, ne daj Bože ako Putin štogod zezne, pa u Njemaškoj nestane struje. Jer kad mogu svi iti u svit, ča ne bi i ja malo sa mula dikod emigrira. Pa dok mi se da,da, biti malo iz sela van !
A do tada lipo vas pozdravlja Vaš PAŠKO !
