Ko zna kad je to doli na plaži bija, oli ono prid zoru kad je bura bila, pa onda par slika bacija i vijest podvalija. Fake news vidilo se odma.

Valjda su mislili goste od Vodic odvratiti. A to more samo dragi Bog i nikor više na svitu ovom. Jer take lipote, friške arije, čista mora, ljubaznih domaćina i pravega uja i vina, a di to ima. Gosti znaju uživati i neće doma ostati. Neće, nima brige! Dolaze u Vodice.

E, baš san danas tamo pasa da vidin kakva je prava stvar. I dobro gledan, dežuran od ranega jutra, ne bi igla na pod pala od turisti iz cilega svita. Pa onda ne bi lud čovk govorija o praznim vodiškin plažami. Čini mi se da je to ista stvar ka prošle godine, ono kad su kod hotela "Punte" u Vodicami vidili i slikali dva velika "morska pasa". Mislili su isto kako nam je turizam crka i da mu nima spasa ako se gosti pripadnu pasa. A kad ono, stručnjaci rekli da su u pitanju bila dva velika igluna.

A tako je to danas – vrime, koriste sve protiv konkurencije i da tuđe unište, i ko da in onda viruje. Nije to sad ništa novo ni posebno, jer uvik je bilo tako, a danas posebno u vrime brzog širenja dezinformacija. Nije svemu virovat!

VAŠ PAŠKO