Paškina ćakula: CMC je zagrija Vodice, a lito je tek počelo

Ćakulaju mi u portu kako je furešti ovih dan i štogod bilo zbog praznika u Njemaškoj, Pfingsten ferija (Duhovi), a sad kad su Duhovi fermali čini mi se da su gosti ostali. Neki filoćoni govoru mi pari da ih je danas još više, sad zbog Petkova CMC-a.

Jutros doli kad je Lile, Lidija Bačić, u kafić pored marine sila cili svit se za njon okrenija. A vidin da je pucala sva od te friškine, lipote i force. Tija san je i ja malo litretavat i za koji intervju pitat, ali nisan zna da li bi ga urednik šjor Pere objavija.

A večeras na rivi počinje festival i sutra na Svetog Antu bit će u selu velika gužva, pari da nas je uvatila srida lita. Kad nastupe još sve te zvizde i furešte zaplešu i dignu vešte, a ko će veselje moć fermat, jer svit se zaželija malo razveselit i na sve te brige i probleme zaboravit.

Ono da će gorivo priko dva eura krešit, sve u dućanima još više poskupit i da furešti svit neće šoldi imat za na moru bit, a onda da će nas i treći Svitski rat uvatit. Živi bili pa vidili šta će nan se sve dogodit.

Lito je prid nami, idemo se veselit i dobro zabavit. Bit će se lipo večeras u selo spustili i na rivi sve te zvizde i svit na jednom mistu vidit i s njima se razveselit.

PAŠKO