A, Bogami dragoga, čini mi se da to nikad neće proć i da nikaka šminka ne more zaminit dobra i ljubazna domaća čovka. Evo, to mi govori svaki s kin sa ovih dan intervju učinit prova i bokun proćakulat, po tin pitanjima Vodic, turizma i mora. Sve je lipo, krasno, ali najbolje se taj smij i dobrodošlica domaćina kod gostiju ćuti. A onda je još kompletna stvar ako to prati lip i mrljušiv apartman, dobra spiza i restoran. Vidin danas doli na Lovetovu krcato, nemaš di metnit šugaman, a večeras me straj u selo poć jer kroz rivu čovk neće moć ni proć. Ali eto, iden provat da bi van drugi put zna kazat kako nan špica lita neće zakazat.

Nego da se vratin na početak, da je lipo vidit nekad koliko gostu malo triba da bi sritan u selu bija. Gledan doli na mulu u Lovetovu, neki dan stoji jedan lipi čovk mlad sa svojon šjoron, gušta. Vidin, furešt je, pa san na prvu svojoj šjori kaza: čini mi se da je to onaj mađarski prešidente Pere Mađar.

Ma u facu onako, čini mi se isti on. Moja mi šjora kaže: ma ne more bit i di bi se Mađar doša anonim na Lovetovo kupat. A ja joj govorin: muči jopet, nikad ne znaš. Ali kasnije, kad san vidija da je taj „Mađar” uzeja metlu u ruke i muja od sitne škalje ofranka, kako bi moga metnit svoj i ženin veliki šugaman, skuža san ipak nije to prešidente Mađar. Ali san svatija to koliko fureštu malo triba da bi sritan bija i da nije tija ležaljku iz auta čapat, nego mu je dražje bilo na mulskom cimentu ležat. Mislin se: E, moj šjor, svaka ti čast, kad se nisi tija na Hangar otić okupat di ima svega modernoga za uživat, nego tu guštaš di manje svita i modernih stvari ima, a nima ni tuša ni zahoda.

Sitin se odma i onog Njemca ča je svako lito odija iz Vodic put Biograda, kako bi u jednu konobu nabasa. Kad san ga pita ča to lipega tamo ima, onda mi je prizna da sa plafona konobe na goste zijaju ženske kupače gačice i grudnjaci. I to je njemu bilo anjc A, a ja san se mislija: vidi čovka šta je bidan išempija. I zanimljivo da je još ženu sa sobon na tu predstavu vodija. A štaš reć nego sto ljudi, sto ćudi.

Nego još vidin, bacilo je danas doli na Lovetovu bilo malo ladnega vitra, kada je neki izvanjak bija, pa nima Zdravka, Zdenka ni Matića. A šta će tek biti sutra kad Pelajić najavljuje frtunal juga. Triba dobro brode vezat.

PAŠKO