Na šepurinskoj rivi nije lako fermat ni svit ukrcat
Početak osmog miseca, u objektivu šepurinska duga riva puna ka šipak. Cili dan se po Prviću điravalo vamo-tamo, kupalo i uživalo. Odilo gori-doli i do Luke na noge opalilo. Pere piše, vidi se na Reditu kake su lipe recenzije. Ljudi ćakulaju, pravi je raj ostavit krcate plaže na kraju i na otok se bokun tresat. Nije važno, na par uri za prominu dovoljno je.
A i svudi drugdi, na Fejsbuku, TikiToku, Instagramu, influenseri rade punon paron i šepurinske lipote šalju na sve bande. Nek vidi cili svit tu netaknutu lipotu i nek se zna kako je na škoju liti lipo uživat u miru, bez auta i ćuti ono: cvrčak cvrči, Ane. Putopisci i književnici pišu kako i koliko je samo lipi taj vodiški akvatorij, a posebno taj biser, otok Prvić, njegovi škoji, sve te prirodne plaže i male uvale di se na donjoj bandi i golači na miru kupaju.
A nakon lipog dana u Šepurini valja na vapor poć i doma sritno doć. E, to nekad zna biti tramak, jer triba u redu čekat na vapor, a uvik i ono isto pitanje: oće li doć na vrime i kako će za rivu stat? Gužva je još veća jer novosagrađena riva u drugom mistu, Prvić Luci, još nije otvorena. Kad će bit, za Božić, i šta se čeka s tin?
A onda na šepurinskoj rivi ka da se kapetan vapora pripa glisera koji se isprid njega na rivu veza i nije se duže vrimena mrda. Kapetan je, prije nego šta je uspija na rivu fermat, uzalud trubija, a u prvom pokušaju nije stat uspija, pa je đir okolo učinija i provu prema Tijatu okrenija. A svit se na rivi bija pripa da neće vapor uspit fermat. Neki su se škicali i pitali: kako se gliser moga tako bezbrižno za glavnu rivu vezat i otić čak?
A štaš, žega je, nima se di fermat, veza ni za lik, a fjaka zna svakog čapat. To je u nas, u Dalmaciji, domaća svakodnevna bolešćina. Ipak, kapetan vapora je u drugon pokušaju svatija da je vozač glisera ostavija "dovoljno" i za njega mista, da se linija 505 more nekako uz rivu tresat i putnike ukrcat. Na kraju je sve dobro ispalo, a Jadrolinijin brod krcat svita prema kraju je krenija. Tako je to u ove dane kad nam stižu ljudi na sve strane, a fetivi imaju pune ruke posla.
Vidin ja po tome kako je teško isprid Olympia Sky naći misto za šugaman digod rastriti. Ma kad san ga tija jučer tamo metniti, ispod onog kafića di ima dobra ladna pića i pive od šest i po eurića, jedan me velik i jak šjor skoro za prsi uvatit tija. A onda, kad san se drugo jutro tija u selu bokun ošišat, ma mislin svega deset minuti posla, rekli su mi da javin za sedan dan. E, tako nan je to kad nas litnja gužva i fjaka čapa. Jedva se čeka kad će sve fermat i gosti poć čak.
PAŠKO
Vrijeme – Vodice
Kalendar događanja
